Dur absoluti eitoenigi Wuesti (@Wuestefans d’ AtacamaWuesti bestoht vorwiegend us Stei und verschiedefarbigaere Aerde, meist kei Sand.) si mir nach fuenf Stund Fahrt de im verschlofene Doerfli Chañaral acho. Nit mol es astandigs Restaurant hets in dem verschlofene Kaff geh:-( @Marc ich verstand dich glaub jetzt was du gmeint hesch vo waege Esse. En Sandstrand hets immerhin gha doch mit riesaegrosse grusigae schlimiga Qualle wo’s agschwemmt het und toti Voegel si au ummeglaege. Also ueberhaupt nit amaechelig zum go Bade.

En Usflug in de Pan Azúcar Nationalpark isch de au no uf dem Programm gstande. Mir si fascht die einziga Touris gsi wo aber immerhin z Fuess zum Mirador ufegloffe si. Sorry Tour Operator das Du fuer eus allei hesch miessa fahre. Verbi an viela Kaktee si mir zwoi Stund ere Stross entlang gloffe. Vom Mirador het me gueti Ussicht ufs Pinguineinseli und s’ Fischerdoerfli gha. Gsellschaft bim Mittagesse het eus es Wuestefuexli gleistet. Mega herzigs Fuchsli 🙂 Wieder in de Zivilisation bim Fischerdoerfli acho hei mir Usschau nach anderne Touris ghalte. Doch leider isch niemerds umme gsi. Und so hei mir dr tuerschti Trip vo eusere Reis gmacht. Fuer 40000 Chilenischi Pesos ca 100 CHF si mir in emene 18 Plaetzigae Fischerboot zur Pinguine Insle usegfahre worde. Doerte hei mir vieli herzigi Humbold Pinguinli gseh. @Flo Chile laengt zum go Pinguine beobachte, muesch nit in d’ Antarktis. Witeruse si mir de in de rauhi Pazifik gfahre und  hei no Seeloewe Koloniea gseh. De si mir heil und trockenen Fuesses wieder an Land acho.