Mir sind scho en Tag fruehner noch Agua Calientes (s Doerfli vor em Machu Picchu) gfahrae und haend doert uebernachtet, damit mr bi dae fruehnschtae Touris sind fuerd Ruinae! In Agua Caliente hets nid viel geh zum Machae. Das chlinae Doerfli bestoht mehrheitlich us Reschtis und Hotel… So simmer vor em Znacht no schnell ins warmae Quellwasser ghoecklet (zum Glueck reisae unseri Bruederli nid mit: scho zum 2. Mol Hot Springs in denae Feriae :)…). Zum Znacht haemmer Guy probiert, Meerschweinli. Naja, do mrs Fleisch raecht het muessae suechae, haemmer no en Dessert brucht zum satt werdae :)! Fuer dae Machu Picchu haemmer dr Wecker freiwillig uf die viertel vor 5i gstellt und sind so mit em 2. Bus uf d Ruinae ufae gfahrae wordae. Eigentlich haettae mr doert en Guide gha. Mir sind aber so ungeduldig gsi zum Inaecho, dass mr nid haen moegae wartae bis s ganzae Grueppli ready gsi isch und sind uf eigeni Fuscht los. Es isch meeega cool gsi so frueh doert obae: fasch keini anderae Touris und Bergae rundum sind in “mystischem” Nebel ighuellt gsi. Noch es paar Foeteli haemmer uns uf ae Weg gmacht zur Wayna Picchu-Wanderig (dr Berg, wo mr uf jedem Machu Picchu-Foeteli gseht). Ufff, es isch steil ufae gangae und alles Stegaetritt! D Ussicht het denn aber fuer alles entschaedigt!! In gueter schwizer Manier haemmer natuerlich die ganzi Wanderig gmacht. Ueber 100ti vo Stegeli abae und Stegeli ufae simmer durch a Urwald und verbi am Mondtempel zrugg glofae. Noch em Mittagaessae und es paar witerae Foetli, diesmol bi Sunnaeschin, haemmer uns uf ae Abstieg noch Agua Calientes gmacht. Natuerlich no meh Stegaetritt fuer unsri doch scho muedae Bei :).. Zrugg in Agua Calientes haemmer zum viertae mol 2 Italiener troffae, wo au uf em Colca Canyon-Trip gsi sind. Uf das haemmer grad mit emae Bierli muessae astossae! Isch eh luschtig, mr trifft unterwegs immerwieder mol es vo dae Reis bekannts Gsicht :).. Haen halt alli chlinae aehnlichi Routae.