Per Bus si mir an die peruanischi Grenze gfahre worde. Do hei alli Insasse miesse usstiegä. Drno hei mir zerscht miesse go astoh zum Soles in Bolivianos wechsle. Drno erneut astoh zum  es Stempeli uf s’ Usreisechärtli zbecho. De isch es ins nögstä Gebäude gange wo sie eus das peruanische Usreisechärtli entnoh hei und es Stempeli in de Pass druckt hei. Z’ Fuess si mir de über d’ Grenze gloffe. Uf de andere Site hei mir de bi de Bolivianos miesse astoh zum d’ Ireisecharte usfuelle und hei au grad euse Pass gstemplet becho 🙂 Per Bus si mir de witer uf Copacabana gfahre. Es herzigs Städtli wo am Titicacasee liggä tuet. Mir hei de chli das Städtli agluegt und sogar es Eseli troffe, wo sich het loh d’ Ohre massierä 🙂 (Isi au do in Bolivä gniessä das s’ Eseli ! 🙂 ) Am nögste Daag si mir de öppä zwoi Stund lahmaschigs Schiffli gfahre in de Norde vor Sunne Insle. Dr Usblick vor Sunneinsle isch eifach herrlich gsi. Mir hei’s richtig gnosse bi Sunneschin über die Inlse z’wandere und drbi jensti Föteli z’mache vo de wissä Berge im Hintergrund und em blaue Wasser 🙂 Nach guet 3 Stund wandere an praller Sunne (d’ Sunne macht de Inslä e Ehr) sind mir froh gsi über eusi Sunnehüetli. (hei de au kei roti Grinde gha wie das anderi gha hei am Schluss) Im Süde acho isch es e mega langi Inkatreppe abe gange zum Hafe wo euses lahmaschigä Bötli eus wieder zrugg uf Copacabana brocht het. S Znachtässä isch ziemlich grusig gsi, drum hämmer uns no es Schoggifondue genehmigt im Hotel *mmhh* 🙂