Nachdem mir am Fritig zobe bim Idunnkle in La Paz bir Patricia und dem Matthias mit Fondue Chinoise in Empfang gnoh worde si, isch es am Samstig mit ihrem Nissan ca 100km über en grosse Pass  ca 5100 m.ü.Min d’ Yungas abe gange. In Coroico 1750 m.ü.M hei mir chli mueh gha überhaupt dur s’ Städtli fahre z’chönne. Es Tanz- und Musikfest hei die dörte grad gha. Schlussendlich hämmers doch no gschafft dankt em Matthias sine Manövrierfähigkeite :-). Im Hotel mit schönem Pool hei mir es Zimmerli bezogä. Es Usflügli ins Städtli het eus de es schampar hässlich’s Bild zeigt. Die Bevölkerig isch bsoffä in de Eggä gläge und es het überall nach Urin und andernä hässlichä Düft gstunkä. Eus isch es de eifach chli z’ grusig gsi und so hei mir in emene Resti eusi Kehlä welle befiechtä. Das hei mir de mit Chicha Mora und Wasser gmacht. Drno si mir no schnell über das Fest gloffe, und wieder zrugg ins Hostale. Dörte chli grelaxt und de au dörte grad Znacht gässe. Am andere Daag si mir nach dem Zmorge an de Pool gläge und hei chli an de Sunne brutzlet. (Teilwies chli z’viel, so das mir eus Sunnebränd gholt hei) Uf dr türstä Stross vo Bolivä isch es de wieder zrugg uf La Paz gange. Dörte hei mir d Ussicht über die Stadt no igfange und si de no mit de Patricia go Ichaufe. Zum Znacht het’s de wieder mol Fleisch vom Grill geh 🙂