Isch eifach e crazy Stadt, so wie die an de Hügel baut worde isch. Mir si mit ere Stadtrundfahrt uf emene Doppeldeckerbuss gstartet. Isch no raecht gemuetlich, wemmer so an allnae wichtigae Plätzli, Gebäude und Strossä verbi chauffiert wird :). Im 2. Teil vo dr Tour ischs zum Valle de la Luna gangä. Mega cooli Steiformationä! Mir händ no fascht dr Bus ufghaltä, will mir emä rächt langä Rundpfad entlang gloffä sind und noch guet dr Hälfti scho wieder vornä hättä söllä si :). Zum Zmittag hets es typisch bolivianischs Gricht geh bi dr Patricia. Am Nomittag simmer ins intressanti Coca-Museum gangä zämä mit dr Patricia. Nochhär het sie uns dr Hexämärt zeigt, wo mr unter anderem toti Lamafötus chan chaufä, was Glück söll bringä für es neus Hus… Bim Souveniershoppä het d Claudia nomol richtig losgleit *hihi*, damit sich ihres Päckli ind Schwiz au richtig lohnt! Uf dr Poscht hämmer sicher e dreiviertel Stund brucht zum s Päckli ufgeh. En richtigä Poschtälauf 🙂 (adi: es riesä Päckli isch unterwegs zu dir :)!)! Zum Znacht simmer nomol fein verköschtig wordä! Und wie dir gsehn, hämmer do ufemä schwizer Laptop die Brichtli chönnä schriebä, drum wieder mol mit ä, ö und ü :)!

Merci vielmol and Patricia und dr Matthias für die 3 tollä täg, wo mir bi ihnä und mit ihnä händ dörfä verbringä!