Lang heit dir uf de Itrag miesse warte.. Dr Grund isch das mir e ganzi Wuche am Endi vor Welt verbrocht hei. Nach 12h Busfahrt inklusive ere Faehrifahrt ueber die recht rauhi Magellanestross si mir de in Feuerland acho. Mit dem Bus isch es ueber holprigi Strosse dur wunderpraechtigi Lanschaft gange. Ab und zue het me paar Gunakos z’ gseh becho. (Ela au das si Verwandti vo de Lamas) Nach ere Pass ueberqueerig si mir in Ushuaia am Endi vor Welt acho. Do hei mir s’ Hotel ufgsuecht wo de Jean-Philippe und d Kathrine fuer eus reserviert hei. (Es Ehepaar wo d Sylive vom schaffe kenne tuet) Fuer mi het’ s de  gheisse Franzoesich rede.. Naja wenn mir nur nit immer das Spanisch uf de Zunge ligge wuerd…

En Usflug zur Estancia Tunel mit de Kathrine und dem Jean-Philippe het eus dur wunderbari Wegli,  Waelder und ueber Chuehweide gfuehrt. (Isi do muess me kei Dreichruez oder Zaeun abmontierae) Immer wieder hei mir aghalte zum das herrliche Panorama mit dem Beagle Kanal und de umliegende Berge z gniesse. Zum Znacht si mir de mit ihne und emene Schwiezer Ehepaar Freddy und Monika us Affoltern am Albis,  wo sit 4 Johr mit dem Camper um d’ Welt reise go All you can eat Znacht esse….Ach min Buch 😉

Als Training fuer die 4 Daegigi Torres del Paine Wanderig, hei mir s’ schoene Wetter usgnuezt und si bi warme Temperature zum noeche Claciar Martial ufgstiege. E Fahrt mit dem Aerosilla (Sessellift)  het eus es paar Hoehemeter Laufe erspart. Mir si de dur en Wald und Schneefelder bis zum Ussichtspunkt gstampft. Es herrlichs Panorama het sich eus praesentiert. D’ Sunne het eus schoen gwaermt, so hei mir warm gnueg gha das mir im T-Shirt hei choenne laufe. Leider isch dr Gletscher scho so wit zrugg gschmulze das mir no haette ueber dr Schnee miesse chraxle.. Aber ohni Schneeschuh oder Ski macht das nur halb soviel Spass, so hei mir das de loh bliebae.

Dr schoeni Nationalpark hei mir natuerlich au no ufgsuecht und si dr Kueste entlang ueber vieli sumpfigi Trails gloffe. D’ Buchte mit dem schoen blaue klare Wasser hei d’ Sylvie an d’Karibik gmahnt, nur isch es viel z chalt zum go bade, do am Endi vor Welt… Zrugg in dr Stadt hei mir dr Bill (Neuseelaender wo mir vom Navimag Schiff kenne) zum Znacht troffe.

S’ Wetter het sich leider langsam verschlechteret so das mir uf en Bsuech ins Gefaengnis Mueseum si. Die paar Ufhellige vom Daag hei mir gnuzt zum  die suedlichsti Stadt vo de Welt go z’ foetelae.  Zobe isch de dr Sylvie ihri Kollegin d’Nicole agreist. Immerhin het sie alli Aschluessflueg verwuetscht 🙂 Nur isch ihres Gepaeck in Rio bliebae 🙁 Aber do d’ Martin (Belgierin wo mir vom Navimag Schiff kenned) Geburri gha het si mir de mit ihre  go Znacht esse und mit Legui (Die argentinischi Antwort uf dr Pisco) go Astosse.

Mit de sportlichae Nicole si mir in Nationalpark go die chline Trails mit Sicht uf wunderbari Seeli go ablaufe. Gseh heim mir leider kei Castor (Biber) aber drfuer vieli Voegel und mega viel Hase wo richtig im Paradies laebed. D’ Sylvie und ich sie de gforderete worde und mit de Gazelle Nicole isch es im Schnellzugstempo nomoll dem Costal Trail entlang gange,… das in guet 2h, statt agaebeni 3h 😉  Bim warte uf de Bus wo eus zrugg in d’ Stadt brocht het hei eus de die erschte Schneeflocke begriesst 🙁

Nochforschigae bi Aerolineas Argentina hei fuer d’ Nicole 100 USD brocht, do ihres Gepaecke immerno in Rio gsi isch. Mit dem Geld si mir de uf d’ Suechi nach warme Chleider fuer sie gange. Das het viel Zyt und mir nerve kostet..(Herre wo nit gern goehnd go Ichaufe, ich chan euch jetzt glaub verstoh) Zum Glueck ha ich ich aber gnueg Chleider wo ich wegwerfe will im Gepaeck, so ha ich ihre mit Chleider choenne ushelfe. Warmi Sache si naemlich am Nomidaag agseit gsi. Mit emene Catamaran si mir uf dem Beagle Canal go Schiffli fahre. Verbi an ere Luechtturminsle mit Seeloewe und Kormorane hei mir, de au s’ suedlichste chilenische Doerfli Puerto Williams gseh. Bir Pinguineinsle acho hei mir nebst de viele Magellane Pinguine au no e anderi Sorte choenne beobachte. Das isch e Rasse vo Pinguine wo in de Antarktis heimisch isch, aber sich anschienend au do wohl fuehlt. Zrugg ueber die rauhi See (Lut Hamburger Lotse oeppe 9 Beaufort grossi Welle) isch es de wieder uf Ushuaia zrugg gange. S’ Feeling uf dem Katamaran isch gsi wie im Eurosat mit dr Mischig vo emene Freefalltower. Immer wie weniger Passagier si de in dr Waermi gsi. S’Personal isch immer wieder dur d’ Reihe gloffe und het alli Luet wo d’ chli bleich gsi sind ufgforderet usezgoh. Naja das isch de es reins Lazaret gsi. D’ Mehrheit vo de Passagier het de an dr fruesche Luft d’ Fischli gfueterett… Und mir hei eus uf s’ grosse bife de Lomo Znacht gfreut 🙂

Schneefall und ischalti Temperature motiviere eim zum Souvenirshoppe und mol wieder dr Blogg upzdate. Huet zobe fliege mir de uf El Calafate nordwaerts und in hoffentlich waermeri  Gegend.