Dank der Nadja ihrem super Hotelplanflugagebot bi ich vo El Calafate via  Buenos Aires uf Puerto Igazú gfloge. En ganze Daag ha ich mehrheitlich im Flughafe verbrocht das will mi Flug vo Buenos Aires uf Igazú 3h Verspoetig gha het:-( Bi de grad zum Sunneuntergang in Igazu itroffe. Verbi isch es gsi mit Sunneuntergang uf die halbi elfi wie ich mir das vom Suede her gwohnt gsi bin 🙁  Bi Dunkelheit bi ich de im Hotel itroffe wo ich dr Mirko, min oestrichischi Sitznochber vom Swiss Flug, troffe han.

Am noegste Daag si mir zaemme go die argentinischi Site, vo de imposante Wasserfaell,  erkunde. Gigantischi Wassermengene wo ueber de Lavaabbruch stuerzed :-0 De viele Gruppereisende si mir elegant us dem Weg gange und hei so nie miesse astoh zum neumae choenne abezluegae. Leider het d Kombination vo Sunnecreme und Antibrum kei gueti Dienste erwiesae und die Moskitos hei mi gfraessae 🙁 Es isch de mega heiss worde und mir si froh gsi das eus dr dichti Dschungel Schatte gspendet het. Maengisch het eim d’ Gischt vo de Wasserfaell agspruetzt und me het sich so schoen choenne abkuehlae 😉  Tucane hei mir keini gseh, sondern nur vieli Woeschbaerae wo dr Weg belageret hei.

Am noegste Daag si mir per Bus ueber die Argentinischi Grenze gfahre wo mir d’ Usreisestempel in d’ Paess druckt becho hei. In Brasiliae het de dr Busfahrer eus Touris usegschmisse. Bim Imigrationsprozedere, wo viel lockerer, weder das vo de Chilene, ueber d’ Buehne gange isch, hei mir en Englaender Mike und en Australier-Pole Andrew kenneglernt. Mir hei de mit ihne dr Weg vor Grenze bis zur Chruezig unter d’ Fuess gnoh und si de in de herannahendi Bus gstiegae wo eus zum Igang vor brasilianischae Site brocht het. Mitenander si mir de go die brasilianischi Site vo de Wasserfaell go erkunde. Muess saege es het sich glohnt ueber d’ Grenze z’goh do me erscht vo doerte gseht wie gigantisch gross eigentlich die argentinischi Site vo dene Cataratas isch.  Die brasilianischi Site vo de Igazú Wasserfaell isch viel chliner, weder die vo de Argentiniaer und me het sie dementsprechend au schneller gseh. Nach dem Burgerzmittag hei mir de beschlosse wieder zrugg nach Argentiniae z’goh. Bi bruehtender Hitz, wo eim fascht grilliert het. si mir zur Brasilianischae Grenze gloffe go dr Usreisestempel hole. Dr Bus het de eus bis nach Puerto Igazú brocht wo mir eus uf es chuels Patagoniae Bier gfreut hei 🙂 Do dr Mirko en voellig eigene Essensrythmus het,  isch er nit mit cho Znacht esse. Zum Glueck ha ich mit de andere beide abgmacht gha.  Es git in mine Auge nuet deprimierenders bim allei Reise, weder allei in es Resti z’ sitzae und Znacht z’ esse:-(

Dr letschti Daag isch bruehtend heiss gsi und me het scho vom nuet Tue gschwitzt. Unglaublichi Hitz het in dem Doerfli gherrscht. I bin de vo dr Hitz in es chuehls Internetkaffi gfluechtet wo ich mol wieder usgiebig skyped han. Nur leider het’s kei Compi mit USB Aschluss gha, so muess ich euch leider mit Foeteli bis zum noegste USB Aschluss Compi vertroestae.