Nach emen schuettelndae Flug bi ich in Buenos Aires acho und ha mi mit dem guete Shuttelservice ins Hostel loh bringe. Im Tango Backpacker Hostel Inn ha ich mi Badwannebettli in emene 8er Dorm wo viel z’heiss und stickig gsi isch bezoge. D Nacht isch de au entsprechend uebel gsi. Die einte hei Holz gsagt (gschnarcht) und die andere hei en mega Krach gmacht wo sie heime cho si. Und am morge uf die Achti si de die erschte scho wieder ufgstande und hei vo neuem afo Krach mache. Ich ha de beschlosse mir go es neu’s Hostel z’ suechae. Bi de im Hostel Suites Obelisco fuendig worde und ha mir en Privatroom gleistet. Per Taxi bi ich mit mim Gepaeck vom Tango Backpacker Hostel Inn ins Hostel Suites Obelisco umzoge:-) Drno bi ich ins San Telmo Quartier gloffe. Han de in emene Resti was gaesse und doerte dr Frank us London kenneglernt. Mit ihm bi ich de ueber dr Maert vo San Telmo gloffe. An dem Maert hei sie alles Moeglicheae verchauft. Vo de alte Chleidli bis zu de vielae Souvenirs hesch alles becho. Ab und zue si mir stoh bliebae und hei de Tangodaenzer und anderne Musiker zueglost und gluegt. Isch es ganz herzigs Quartier wo e Mischig vo Paris und Italie isch. Zum Znacht ha ich de d’Sylvie und ihri Wadtlaender Kollege vo Ushuaia, d’ Kathrine und de Jean-Philippe troffe. Mitenander si mir ins moderne Puerto Madero go es riesaegrosses Bife de Lomo esse 🙂
Wow ha ich ich guet gschlofe in mim Einzelzimmerli, isch richtig erholsam gsi 🙂 I han mi de uf dr Lonley Planet Stadtwalk mit Shopping gmacht. In ere Buechhandlig ha ich de Biecher ueber d’ Parilla postet. (Alex han an dich denkt) Mis Shoppingziel e gueti Jagge, ha ich leider nit erreicht 🙁 D’ Sunne het de Buenos Aires ganz schoen igheizt und bi 28 Grad bi ich de mit churze Hose und dem Traegertishi witer dur die vielfaeltigi Stadt Buenos Aires gloffe. Ha natuerlich no die einte oder andere schoene Gebaeude uf dem Weg miesse fotografisch festhalte. Mini Suechi nach Outdoorequipment Laede isch de witer gange. Leider hei die Laede scho zue gha, do sie nach dr Siesta nuemme ufgmacht hei, das will jo huette Heiligae Obe isch. Wenigstens het dr Carrefour no offe gha und i bi mi doerte mit Wasser und es paar witere Souvenirli go ideckae. Ha jo wenigstens en Legui miesse heime bringe;-) Dr Heiligi Obe ha ich mit dr Sandrine us Belgie und dem Frank us England verbrocht. Mitenander si mir ins moderne Quartier Puerto Madero go es Resti suechae. Do mir frueh dra gsi sind hei mir Glueck gha und si in eim glandet wo no Platz gha het. S’ Esse isch nit grad s’ Besti gsi, doch immerhin besser, als MC Food am Heiligae Obe. Eus isch es de au nit grad Heiligobemaessig vor cho ,viel z’warm, eher so 1. August maessig, was dur die Rakete wo sie abgloh hei no verstaerkt worde isch. Die andere Luet si de no in d’ Disco, relativ schreg. Dur die verlassene und mager dekorierte Strosse si mir de ins Hostel zrugg go schlofe.

Nach dr morgendlichae Duschi het de s’ Packe wieder agfange. Mini alte Chleider und mini Turnschuh ha ich de in d’ Chiste fuer die arme Luet do und bi go Panetonezmorge Esse, mol es Wiehnachtszeichae:-) Min schwere Rucksack mit de vielae Souvenir ha ich de deponiert und bi mit dem Fotiapparat nach Puerto Madero go die moderne, und teilwies au alte, schoene Gebaeude go festhalte. Just in Time bi ich de vo mim Stadtwalking wieder zrugg gsi und mis Taxi fuer an Flughafe het scho uf mi gwartet.