I bi jo extra frueh an dr Wiehnachte an Flughafe will ich mi Tic no han miesse umschriebae loh. Vo Swiss het niemerds das welle tue im Buero und so hei sie mi ins Lufthansa Buero gschickt. Das Buero isch zue gsi und so bi ich de halt mol go’s Tam Buero suechae. Muess saege die Buero si hinter de Checking Schalter vo de Flughaefe versteckt und me chunnt sich scho komisch vor, wenn me doert hindedure lauft. Bi Tam hei sie mir de e Bestaetigung usdruckt das ich dr Flug J8005 vo Buenos Aires uf Sao Paulo han und vo doerte witer mit dem LX97 uf Zueri. Vo Billet umschriebae hei au die nuet welle wuesse und so bi ich de go Ickecke. Am Checking hei sie mi ohni Problem loh icheckae und mir sogar dr Boarding Pass fuer dr LX97 Flug zrugg in d’ Schwiez in d’ Haend druckt. Geld hei au die keis welle gseh:-0 Viel z’viel Pesos in mim Portemonnaie ha ich de beschlosse ich shop no paar Saecheli zum mini Pesos los z’waerde. Immerhin hei am Flughafe d’ Laede offe gha, in dr Stadt isch naemlich alles zue gsi:-( Gege die halbi Vieri hei mir de doerfe in ‘s Flugi stiegae. I han dr Luxus vo mim Fensterplatz und ere ganze Reihe vo Sitz fuer mi allei gha. Das Flugi isch zu oeppe 1/4 gfuellt gsi mit Passagierae. Dr Flug uf Sao Paulo het gueti 3 Stund dured und isch au nit grad dr ruhigsti gsi, will es paar Gwitterzelle hei miesse durfloge waerde.
In Sao Paulo isch de die laestigi Handgepackdurchluechtig agstande. Zum Gluck ha ich mini Kassezetteli ufbewahrt gha und mi Flaeschli Wasser grad hinderegschuettet;-) Nach dem Terminalwechsel bi ich de bim Swiss Schalter acho. Ha mi de brav bi de Luet gmulde und ihne mis Tic us Buenos Aires praesentiert. D’ Lady het de scho zum Telefon griffae het mini Kreditcharte welle. Zum Glueck isch aber dr netti Arbetskolleg vo ihre ufmerksam worde und het gsait das soell sie vergaesse ich hebi jo mis Tic scho. I han ihn de gfrogt oeb ich nuet miessi zahle. Er het gfunde das sigi e Sach vo de Swiss in Buenos Aires und huette sigi wenigstens Wiehnachte. So hei sie mir die Umbuechigsgebuehr gschenkt 🙂 Mega nett, dr netti Herr het mir de no en guete Flug gwunsche und gsait er will au mol wieder Wiehnachte bi Schnee fierae choenne. Als eini vo de letschte bi ich de Just’s in Time ins Flugi gstiegae und bald isch es los gange. Han au diesmol 2 Sitz fuer mi allei gha. Voll edel:-) Au diesmol isch dr Flieger nit voll gsi;-) 11 langi Stunde Flug si agstande und ich han wieder choenne Game. Bi aber nit ueber s’ Level 13 vom Caveman us cho 🙁 Gschlofe ha ich praktisch nuet evtl. 1h maximal.. die Turbulenze si au nit grad die schwaechste gsi und ich ha mi paarmol miesse aschnalle. Sogar vor de 11h isch de de Flieger in Chlote glandet und doerte hei mini liebe Kollege uf mi gwartet:-)
Es isch scho schoen in Schnee doerfe zrugg in die schoeni Schwiez z’cho und zum Z’nacht es Fondue z’esse. Das isch eher Wiehnachtsstimmig fuer mi 🙂
Eusi 3 Monet Suedamerkia hei mir super gfunde und mir empfehlae euch au mol z’goh. Falls Dir Reisefuehrer oder mehr Info waend loehnd’s eus doch via emene Comment Itrag wuesse.
Vielae Dank fuer s’ Laese vo dem Blogg, Regi und Claudia wo wieder in dr Heimat si:-)