Bariloche

Wieder emol haemmer Glueck gha und die 2 letschtae Bettli verwuetscht im Hostel :). Bariloche het uns ziemlich and Schwiz erinneret: s het viel Chalets, en See mit Bergae im Hintergrund, ueberall gits Schoggi zchaufae, in dae Reschti chammer Fondue ha und d Touris choennae sich mit emae Berhardinerhund mit Faessli zaemmae foetelae lo (wie langwilig :)….). Zobig haemmer so richtig argentinisch gschlemmt: es riesae Fleisch und e Flaeschae Malbec Wi *superlecker*. Am negschtae Tag haemmer uns uf ae Sattel gschwungae. Uf erae Estancia in dr Noechi vom Ort haemmer e Halbtagesusflug per Ross gmacht. D Claudia het ihres Pferdli grad profimaessig im Griff gha, waehrend daem ich chli Afangsschwierigkeitae gha han (min Schimmel het lieber wellae trinkae als laufae, gfolgt het mir das Pferdli au nid und denn isch mr au no dr einti Zuegel us dr Hand gheit… aber dr “rettendi” Cowboy isch schnell zur Stell gsi :)!). Mir sind dur e mega schoeni Landschaft grittae, shet uns beidae extrem Spass gmacht! Am Nomi simmer denn chli durch Bariloche und d Laedeli gschlenderet. Am 2. Tag simmer per Sessellift (chli fuul….) uf ae Cerro Campanero, vo doert obae haemmer e super Ussicht gha ueber dr Lago Nahuel Huapi und die vielae Inseli. Per Bus simmer nochaer zum glichnahmigae Nationalpark gfahrae und sind doert zumae idyllischae See gwanderet fuers Picknick. Zobig simmer denn momol fett go Fleisch aessae, do’s am Tag druf jo wieder adieu Argentiniae gheissae het!

Leave a Reply