230 Kilometer wit eweg vo El Calafate lit die juengsti Stadt vo Argentinia Names El Chaltén. Nach guet 4 Stund Busfahrt ueber recht holprigi Strosse bi ich im Wulche verhangene El Chaltén acho. Ha de mol chli grelaxt und mi chli erkundet was es in dere Stadt het. Uf allifaell kei Bankomat und au kei Natelnetz 🙁 (Cha dr Grund si wiso ich euchi Gebisms nit becho han, Danke an dere Stell allne wo mir eis gschickt hei).  Nach dem Zmittagesse ha ich d’ Michelle wieder troffe. Bi de gege Obe wo d’ Wulche de Sunne Platz gmacht hei mit ihre und emene feine Malbec Why zum Fitz Roy Mirador ufgstiegae. Perfekti Sicht uf de Fitz Roy hei mir gha und es isch recht warm gsi an de Sunne, mol zur Abwechslig ohni chalte Patagonische Wind 🙂

A mim Geburri ha ich mir de uf dr Weg zum Cerro Torre begeh, han doerte es Paaerli us Maur troffe. Bi de mit ihne bis zur Lagune ufgstiegae. Leider hei die Wuchle dr Cerro Torre mir nit zeigt 🙁 So bi ich de witer dur die schone Wanderwaegli verbi an witere Lagune gloffe. Han scho wieder dr Fitz Roy mit wunderbarem Bergpanorama choenne bestune. Aschliessend ha ich mi an Abstieg gmacht und bi nach guet 7 Stund laufe wieder in El Chaltén gsi, wo ich mit emene Bierli no han choenne,  mit de beide Amis vom Perito Moreno Gletscher,  agstosse, bevor ihre Bus  gfahre isch. (Zum Znacht bi ich vor Sylvie und de Nicole zu emene Bife de Chorizo im Hostel iglade worde. D’ Michelle isch au drbi gsi und het mir dr feini Malbec Why spendiert 🙂  Es isch aber leider kei Feststimmig ufcho 🙁 mir si alli recht mied gsi vom wandere und dementsprechend bi ich de au ohni Geburritorte go schlofe. Hei aber immerhin no mit Legui agstosse;-) De Geburri muess de in de Schwiez nochgfiered waerde.

Am noegste Daag ha ich eigentlich welle zu de Lagune las tres ufstiegae. Leider het’s viel Wulche am Himmel gha und so bi ich zu emene Wasserfall gloffe, wo aber ueberhaupt nuet spektakulaers gsi isch.. Naja han de gfunde am Nomidaag gang ich doch no in d’ Hoechi und bi zur Lagune Capri ufgstiegae. Han de doerte scho wieder die beide us Maur troffe. En Duetsche het mi no nach dem Weg gfrogt und drufabe hei sich pensionierti Romands nach dem Mirador erkundet… Scho wieder ha ich miesse Franzoesisch rede.. Glaub die Welsche verfolge mi no..  Zum Znacht bi ich de vor Gisela und dem Wolfgang (Duetschi wo ich us Ushuaia kenne) iglade worde 🙂

Frueh us de Federe het’s de am Sunntig gheisse. Uf die siebeni isch me in emene zackigae Tempo abgloffe und erneut zur Lagune vom Cerro Torre ufgstiege. Han jo de Weg scho kennt… Nur diesmol isch es rechts zum Camping gange wo mir mit Kaffi und Gutzi versorgt worde si. De hei mir die reschtlichae Luet vom Ice Trekking troffe. Eusi Gruppe isch us, 6 Brasilianer, emene Duetsche und emene Paerli us Prag,  bestande. Es Gstaelti und Stiegisae het jede becho. Eusi knackigi Bergfuehrer Louis und Matthias si eus vorgstellt worde (Isi das waere Maenner fuer dich 🙂 ) Nach ca 30 Minute Laufe isch me de zu emene Fluss cho wo me am Seil gsicheret so a la Seilbaehnli het miesse ueberqueere. Ueber Groell isch es witer zum Wald gange wo me steil het miesse ufwaerts laufe. Verbi an emene Bach wo me sich het choenne d’ Wasserflaesche mit guetem patagonischem Wasser uffuellae:-) isch es de abwaerts ueber grossi Stei zum Gletscher gange. Uf dem Glaciar Grande hei mir d’ Stiegisae montiert und si bitzeli ueber Isspitzli gwanderet. S’ Zmittag hei mir de au grad uf dem Gletscher gaesse. E cheibe nass, chalti Sach.. Aber zum Glueck het sich d’ Sunne mol churz zeigt. Drno hei mir choenne Ischlettere. (Hey Cousin Jon das macht mega Spass will mol mit Dir mitcho chlaettere). Wo de alli klaetteret si und zu mim erstune d’ Brasilianerinne am Beste, isch es denne dr glichi Weg zrugg zum Camp gange. Doerte het eusi Lady wieder uf eus gwaret und mir si puentklich uf die siebeni wieder mit miede Bei  in El Chaltén gsi.

Am letschtae Daag het’s Packe gheisse und de isch leider d’ Zyt z’ knapp gsi zum no choenne zum Mirador vom Cerro Torre ufzstiege. De isch naemlich ohni Wulche Sichtbar gsi.. Naja so bi ich halt nur zum chline Condor Mirador ufgstiegae und han vieli Cerro Torre Foeteli gmacht 🙂  Nach emene Hamburge Zmittag isch es de mit dem holprigae Bus wieder zrugg in d’ Zivilisation uf El Calafate gange.